Яңа Чишмә районы авылларында Коръән бәйгеләре үтә башлады

2012 елның 3 маенда Яңа Чишмә районы Акъяр авылы китапханәсендә авыл мәчетенә укырга йөрүче балалар арасында, Диния нәзарәте тарафыннан игълан ителгән Коръән елы кысаларында, Коръән укучылар бәйгесе үткәрелде. Бәйгене мәчет каршындагы укуларны оештыручы Исламия ханым оештырды. Әлеге бәйгедә шулай ук Яңа Чишмә районы мөхтәсибенең урынбасары, Яңа Чишмә авыл мәчете имам-хатыйбы Илдар хәзрәт Хәсәнов һәм Акъяр авыл мәчете имам-хатыйбы Галимҗан хәзрәт Гайфуллин да катнаштылар. Исламия ханым билгеләп үткәнчә, үткәрелгән чараның төп максаты – яшь буынны дин юлында тәрбияләү, Изге Коръән китабына карата мәхәббәт уяту, тормышларын Коръән кушканча алып барырга чакыру.