Бүген Татарстан Диния нәзарәтенең “Хозур” Нәшрият йортында Каһирәдәге шәех Мәхмүд Хәлил әл-Хусари фонды башкарма директоры, шул ук исемдәге Коръән үзәге директоры, педагогика фәннәре докторы, әл-Әзһәр университетын тәмамлаучылар Лигасы каршындагы Мәгариф һәм фән департаменты җитәкчесе, Болгар ислам академиясе визит-профессоры Хәмделла әс-Сафти булып китте.
Очрашу кысаларында Татарстан Мөфтие урынбасары Ришат хәзрәт Хәмидуллин һәм Хәмделла әс-Сафти шәех Мәхмүд Хәлил фонды һәм Нәзарәтнең “Хозур” Нәшрият йорты арасында хезмәттәшлек турында килешү төзеделәр. Аның нигезендә Мисыр ягы “Хозур” Нәшрият йортына Мисырның мәшһүр Коръән укучысы Мәхмүд Хәлил әл-Хусариның аудиоязмаларына хокукларны тапшырды. Шул рәвешле, әлеге язмалар алга таба нәшрият ресурсларында кулланылачак һәм Россиядә киң җәмәгатьчелеккә ачык булачак.
Мисырдагы мәшһүр Коръән укучы Мәхмүд Хәлил әл-Хусари илле биш ел гомерен Изге Китапка хезмәт итүгә багышлаган. Аның укуы әлегә кадәр эталон булып санала, ул ун кыйраәт буенча Коръән уку остасы булган һәм үзенең матур тавышы һәм авазларны камил әйтүе белән дан казанган. Мәхмүд Хәлил Әл-Хусари Коръән-Кәримне Гасыйм кыйраәтенең Хафс риваяте нигезендә укып, беренчеләрдән булып аны аудиотасмага яздырган: әлеге вакыйга Коръәнне дөрес уку традицияләрен тарату һәм саклау өчен бик зур әһәмияткә ия була. Мисырда әл-Хусари исемендәге 17 Коръән өйрәнү үзәге бар.
