Иртәгә Казанда һәм Татарстан шәһәрләрендә һәм районнарында Ураза бәйрәме хөрмәтенә гомумшәһәр балалар һәм гаилә бәйрәмнәре узачак. Мөхтәсибәтләр балалар һәм аларның ата-аналары өчен мавыктыргыч һәм файдалы программа әзерләде: тәм-томнар, викториналар, конкурслар, бүләкләр, актив уеннар, карусельләр, ярминкәләр... Бәйрәмнәр мәчет ишегалларында һәм башка җәмәгать урыннарында – паркларда, җәяүлеләр йөри торган урамнарда, спорт комплексларында узачак.
Казанда шәһәр халкын һәм башкала кунакларын түбәндәге локацияләрдә көтәләр:
- Иске Татар бистәсендә “Мәрҗани” мәчете янында 13:00 сәгатьтә "Рамазан фест" бәйрәме башлана
- “Гаилә” мәчетендә балалар бәйрәме 10:00 сәгатьтә
- “Әхмәдзәки” мәчетендә гаилә бәйрәме 13:00 сәгатьтә.
Татарстан районнарында да бәйрәмнәр узачак:
- Алабуганың “Чебурашка” паркында 13:00 сәгатьтә: интерактив күңел ачу программасыннан тыш, кунакларны бәйрәм пылавы һәм татлы мамык белән сыйлаячаклар.
- Яр Чаллыда “Тәүбә” мәчете янында һәм Г.Тукай исемендәге яр буенда 11:00 сәгатьтән ярминкәләр эшли башлый, 14:00 сәгатьтән бәйрәм рәсми рәвештә ачыла
- Сарманда Җәмигъ мәчете янында 14:00 сәгатьтә 12 яше тулмаган балаларны көтәләр, аларга бүләкләр, мастер-класслар һәм бәйрәм чәе әзерләнде
- Баулыда “Гали” мәчете янында 9:00 сәгатьтә
- Теләчедә Үзәк ял паркында 13:30 да
- Лаешта "Ихлас" мәчете янында - 10:00 сәгатьтә, "Мәдинә" мәчете янында 10:00 сәгатьтә, Пәрәү авылы мәчете янында 10:00 сәгатьтә. Сокурыда "Ихсан" мәчете янында бәйрәм 21 мартта узачак
- Менделеевскида Җәмигъ мәчете янында 13:00 сәгатьтә, бәйрәмнән тыш, биредә таравих намазына күбрәк йөргән балалар арасында “Рамазанны намазда үткәрү” акциясенә йомгак ясалачак
- Лениногорскида "Юбилейный" паркында 13:30 сәгатьтә
- Мөслим спорт комплексында 13:30 да ир балалар арасында Рамазан Кубогына мини-футбол узачак; биредә үк 9:00 дә 6 яшьтән зуррак ир балалар һәм ир-атлар, 6 яше тулмаган ир балалар һәм хатын-кызлар арасында ярышлар узачак.
Сезне бәйрәм чараларына көтеп калабыз! Ураза гаете мөбарәк булсын!
