«Әл-Әзһәр» академиясе дин галимнәре Татарстан мәчетләрендә тәравих намазлары үткәрә, дини лекцияләр укый һәм Коръән уку буенча дәресләр уздыра. Алар изге Рамазан аеның соңгы көннәрендә гыйлем, бәрәкәт тарата, изге Коръән аятьләренең кабатланмас аһәңен яңгырата.
Әл-Әзһәр” академиясеннән (Мисыр дәүләте) җиде дин галиме республикабызга Татарстан Диния нәзарәте чакыруы буенча март башында килде. Делегациягә Коръән укучылар һәм ислам фәннәре мөгаллимнәре керде. Алар Чистай, Кукмара, Әлмәт, Лениногорск, Арча, Түбән Кама һәм Бөгелмә мөхтәсибәтләренә җибәрелде.
Сәфәр Татарстан һәм иң эре ислам мәгарифе үзәкләренең берсе арасында дини багланышларны ныгыту максатыннан тормышка ашырыла.
